Петнаесет илјади долари се донирани во кампањата за борба против ракот на дојка на Здружението „Борка – за секој нов ден“. Со донацијата ќе се реализираат нови едукации на жените за самопреглед и тоа во општините Охрид, Свети Николе, Велес и Струмица, каде е евидентирана највисока стапка на смртност од тој карцином со цел да се едуцираат младите за навремено откривање и превенција на ракот на дојка.
Средствата се наменети за одржување на постоечкиот СОС број 0800 55 777, како и за отворање нова мобилна СОС линија 075 22 88 99, која е достапна седум дена во неделата од 9 до 21 часот. Станува збор за донација од козметичката компанија Авон Македонија.
На СОС линијата се нудат информации за закажување прегледи, административни процедури, процедури за операции, справување со хемотерапија и радиотерапија, како и совети за исхрана, пост-третман и психолошко советување и поддршка. На единствената бесплатна СОС линија која компанијата ја отвори во 2006 година во партнерство со здружението „Борка“ досега се јавиле повеќе од 12.000 лица, а бројот на повици од ден на ден сè повеќе се зголемува.
Од компанијата посочуваат дека кампањата за борба против ракот на дојка во Македонија почнала пред 8 години и оттогаш речиси секоја година спроведуваат повеќе активности и донации за помош и поддршка на заболените.