Австриската Влада денеска, најверојатно, ќе го откаже одржувањето на главниот виенски Бал на операта за следната 2021 година. Причината е епидемијата на коронавирусот.
– Оваа одлука не е лесна, но би било неодговорно балот да се одржи на вообичаен начин, изјави австрискиот канцелар Себастијан Курц. Тој и вицеканцеларот Вернер Коглер, во заедничка изјава истакнаа дека фактот што ваквите манифестации се можни жаришта на зараза, ги принудува да го откажат и Оперскиот бал.
Свеченоста требаше да се одржи на 11 февруари 2021 година.
Виенскиот комитет за традиционални балови минатата недела донесе одлука да ги откаже сите свои други балови. Сезоната на балови во Виена е важен економски фактор, имајќи предвид дека минатата година, според проценките на националната Стопанска комора, околу 520.000 посетители придонеле за приходи од 151 милион евра.