Австралија оваа година ќе учествува на натпреварот за Избор на песна на Евровизија, што ќе се одржи во Виена на 23 мај.
Вкупно 40 земји ќе учествуваат на годинешново натпреварување, кое ја одбележува својата 60-та годишнина.
Иако Австралија не е членка на Европската радиодифизна унија (ЕБУ), таа сепак доби покана од организаторите на фестивалот за еднократен настап на ова натпреварување.
– Ова е храбар и во исто време возбудлив чекор.Тоа е нашиот начин за да прославиме заедно, едно вакво натпреварување, изјави Јон Оле Санд, еден од главните функционери на Евросонгот.
Според него, на Австралија и е дадена „вајлд-карта“ за учество директно во финалето, затоа што станува збор за едно учество.
Австралија ќе може да гласа во двете полуфинални вечери, како и во финалето. Сите други земји-учеснички ќе може да гласаат за австралиската песна, која се уште не е избрана.
Доколку Австралија победи, идната година евровизиското натпреварување нема да се одржи на австралиски терен, туку во некој од градовите во Европа, но Австралијанците ќе може да ја бранат победата и уште еднаш да учествуваат на Евросонгот.
Фестивалот за Изборот на песна на Евровизија се пренесува во Австралија повеќе од 30 години. Телевизиската компанија Ес-Би-Ес, која ги врши преносите, соопшти дека Песната на Евровизијата е популарно натпреварување, па секоја година изборот има висока гледаност.
Австралија првпат ќе учествува на Евровизија, но тоа нема да е првпат Австралијанци да се појават како пејачи на фестивалот. Досега за Велика Британија настапуваа тројца австралиски музичари – прво групата „Сикерс“, подоцна Оливија Њутон Џон, која во 1974 за малку загуби од АББА и песната „Ватерло“, и на крајот пејачката Џина Џи.