„Македонска реч“ објави антологија на современа епистоларна проза со наслов „Пишувачот“, приредена од Весна Мојсова-Чепишевска.
Во антологијата се застапени текстови од: Татјана Кокаљ и Јана Коларич (Словенија), Јопана Шчепковска, Јануш Леон Вишневски, Јежи Сосновски, Хана Ковалевска (Полска), Ренато Баретиќ (Хрватска), Азриел Библиович (Колумбија), Русана Бардарска (Бугарија), Ана Дасиалго / Гордана Влаиќ (Србија), Горица Нешовиќ (Србија), Јелица Грегановиќ (Словенија), Хуан Хосе Миљас (Шпанија), Хуан Е. Миранда (САД) и Маркос Пико (Мексико). Преводите се на Лидија Танушевска, Соња Должан, Елена Атанасиу, Душко Крстевски и Ѓоко Здравески.
Мојсова-Чепишевска на почетокот на книгата пишува дека е крајно личен изборот на раскази и фрагменти од романи кои, истакнува таа, своите приказни ги градат како љубовни писма, преписки и дописки, СМС-пораки, електронски писма и допишувања, како приказни од едно блогерско искуство…
– Застапените автори докажуваат и покажуваат дека во разните современи дијалошки форми (пејџерски јавувања, електронски писма, СМС, блогерски разговори и допишувања, мудрувања), сепак, не нè отуѓува најновиот тип комуникација, зашто комуникацијата зависи од оние кои ја водат, а не од средствата. Па така, сите овие избрани автори успеале да раскажуваат, опишуваат, ослушнуваат, чувствуваат, сакаат, уживаат, тагуваат… и едноставно да создаваат приказни, пишува Мојсова-Чепишевска, која е проф. на Филолошкиот факултет „Блаже Конески“ по предметите Светска книжевност за деца и Македонска книжевност за деца.
Автор е на книгите: „Рацин и експресионизмот“ (2000), „Литературни преокупации“ (2000), „Лицето на зборовите“ (2004), „Мал книжевен тестамент“ (2007) и „Игра и симулации“ (2011). „Пишувачот“ е нејзина петта антологија.