Претседателот на СДСМ Зоран Заев, на сите граѓани на Република Македонија им го честита Меѓународниот ден на трудот – Први мај, со надеж дека во иднина ќе се вреднува трудот на работникот , како и дека конечно ќе се создаде амбиент во кој работникот ќе ги ужива заслужените права.
СДСМ со жалење констатира дека веќе подолг период, на македонските работници им се одземени правата, сигурноста и достоинството, а сите стандарди за пристојна работа се погазени. Македонскиот работник секојдневно е изложуван на понижување:
– Според работната недела, Македонија спаѓа во групата европски земји кои имаат долга работна недела со 40 часа.
– Постојат бројни примери за кршење на правата на работниците, недоволно платен или воопшто неплатен труд, мобинг и изложување на насилство, ризични услови на работното место;
– За жал, во последните неколку години во Македонија на своите работни места загинаа повеќе работници од различни дејности.
Надлежните институции и пред се најповиканата организација за заштита на работничките права и труд, Сојузот на синдикати, остануваат само неми набљудувачи на ваквите серозни состојби. Со тоа се соучесници во угнетувањето на правата на работниците.
Водејќи се од основните социјалдемократски вредности на слобода, еднаквост и солидарност, СДСМ продолжува да се заложува за зачувување и унапредување на правата на работниците, како преку своите програмски решенија, мерки и определби, така и преку активно дејствување во граѓанската борба за работничко достоинство. Неопходно е приоритет на државата да биде социјална заштита и праведност за сите, економска безбедност, праведна распределба на животните можности и рамноправност.
Нека е честит Меѓународниот ден на трудот.