Градоначалникот на општина Центар, Андреј Жерновски, со своите соработници оствари средба со жителите на населбите Пролет и Ново Маало.
На почетокот ги замоли на 26-ти април да излезат и да го искажат своето мислење за изгледот на Градскиот Трговски Центар.
„Мојата лична одлука е ЗА, но Вие гласајте и изразете ја својата волја онака како што Вие сметате. Нема подиректно и поконкретно учество на граѓаните во одлучувањето од референдумот, затоа на 26-ти, в недела, појдете на местата каде што гласате за локалните, парламентарните и претседателските избори“, ги повика жителите на Пролет и Ново Маало, градоначалникот Жерновски.
„Срамота е некој да се изжувува за ГТЦ. Да излеземе и да гласаме за референдумот“, порачаа жителите на Пролет и Нова Маало.
Во овој дел на Центар, во најстарата скопска населба – Пролет, ќе се менува комплетниот лик. Со инвеститор ќе се зголеми катноста на зградите за уште 2 спрата, а инвеститорот, доколку се согласат граѓаните, ќе ги направи сите фасади со термичка изолација и со енергетски пасоши, велат од Општина Центар.
„Ќе ги обновиме вертикалните водоводни мрежи, ќе ставиме лифтови, нови сензорски светла, нови влезни врати и домофони. Статичкиот дел на зградите нема да биде оптоварен и ќе се гради во согласност со сеизмичките прописи“, рече инвеститорот Љупчо Димитриевски од Гланцбау.
„И проширувањето, доколку го има, нема ништо да ги чини станарите. Сметките за струја, рече Жерновски, со вака изведени фасади ќе бидат пониски и до 30%, а ние добиваме среќни и задоволни граѓани. Општина Центар комплетно ќе го уреди околниот простор.
Бисера Јакимовска, раководител на Секторот за урбанизам и просторно планирање, рече дека нивните згради се типски и наместо приземје + три ката, како што се сега, ќе се оди на приземје + пет ката + поткровје. Гаражите, рече, какви што се сега, не може да останат. Тие ќе се урнат и ќе се обезбеди паркинг за секој стан.
Договорена е средба со жителите на овој дел од Центар за надминување на проблемите со паркингот“, соопштуваат од Општина Центар.