Градоначалникот на општина Центар, Андреј Жерновски, денеска свечено ја пушти во употреба реконструираната улица „Орце Николов“, на потегот од булеварот „Св. Климент Охридски“ до улицата „Михаил Цоков“.
Вкупната реконструирана површина е 3.600 м2, должината е 520 метри и ширина – 7 метри.
„Поставени се нови шахти и поправени се оштетените ивичници. Цели 18 години овој дел на улицата не беше саниран и беше во многу лоша состојба.
Граѓаните се жалеа дека ударните дупки го оневозможуваа нормалното одвивање на сообраќајот и беа потенцијална опасност за безбедноста.
И реконструкцијата на „Орце Николов“, како и сите досегашни проекти, во овие 2 и пол години во општина Центар, по доаѓањето на новото општинско раководство, се без ниту еден денар поддршка од централниот буџет, нешто што не е случај со другите општини“, соопштуваат од Општина Центар.
На свеченоста присуствуаа вработени во општина Центар, дел од советниците и граѓани.
„Ниту за еден од медиумите ова не беше настан, иако на 2 пати беа уредно поканети. Граѓаните особено се интересираа зошто нема екипа од јавниот сервис МТВ“, пишува во соопштението на Центар.
„Имам информација дека на МТВ и’ е забрането да ги следи настаните, манифестациите и проектите кои ги спроведува или се случуваат во општина Центар“, рече Жерновски.
Реконструираната улица „Орце Николов“ е дел од проектот „Работно Лето 2015“ на општина Центар, проект кој се реализира во соработка и договор со граѓаните.
Се реконструираат улици, водоводна мрежа, се прават паркови, се поставува зеленило, се реконструираат училишта и градинки, а она што е особено значајно е што, по цели 40 години во општината, со сопствени средства од општинскиот буџет, се гради новата, современа градинка – „Кочо Рацин“.