„Градоначалникот на општина Центар, Андреј Жерновски, денеска во Министерството за надворешни работи на Република Франција оствари средба со Гијом Русон, директор за Балкан.
Двајцата соговорници разменија мислења за актуелната состојба во Република Македонија, за Договорот од Пржино и за неговата реализација.
Жерновски и Русон разговараа за улогата на специјалната обвинителка за разрешување на кризата, предизвикана од прислушувањето и обелоденувањето на прислушкуваните разговори.
Од француска страна е изразена поддршка за Евроатлантските амбиции и за демократизација на Република Македонија, согласно утврдените точки во Договорот од Пржино. Русон се интересираше за прашањето за името и за меѓуетничките односи во Македонија, изразувајќи надеж дека Македонија до изборите ќе го положи тестот на политички и на меѓуетнички план.
Претходно, во Француското Национално собрание, градоначалникот на општина Центар оствари средба со пратеникот Филип Диром, претседател на Комисијата за Француско-Македонска соработка.
Двајцата соговорници изразија надеж и желба за продлабочување и продолжување на натамошната соработка помеѓу Република Франција и Република Македонија, како и соработка на општини од Франција со општина Центар.
Од француска страна, општина Центар доби поддршка за натамошна демократизација и за продолжување на досегашната транспарентна и отчетна работа.
За утре е предвидена работна средба со заменик-градоначалникот на Париз“, се вели во соопштението на Општина Центар.