Градоначалникот на општина Центар Андреј Жерновски се надева дека судијата ќе му издаде одобрение на претседателот на Советот Мирослав Шиповиќ за присуство на седници. Претседателот Мирослав Шиповиќ од петокот се наоѓа во домашен притвор.
“Со ова ќе се докаже дека не се работи за политички монтиран процес, иако сум убеден дека притворањето на Шиповиќ беше политичка одлука. Верувам дека сепак од идната седница Советот на општина Центар ќе работи во полн состав“, изјави Жерновски.
Одговарајќи на новинарски прашања, Жерновски кажа дека спомениците на албанските дејци се уште не се пристигнати и се уште не се платени. Парите за спомениците се од Министерството за
култура. Жерновски праша кога ќе биде поставена оградата на мостот кај „Холидеј Ин“, за која се тврдеше дека не е направена, а подоцна беше пронајдена во депоа, што за градоначалникот на Центар претставува криминал.
За субвенцијата до 3000 денари за нови велосипеди, граѓаните ќе можат да се јават по објавувањето на огласот за што ќе има известување во медиумите и на веб страната на општината.
Ова е пилот проект, рече Жерновски и оваа година околу 800 граѓани ќе добијат средства за купување на нови велосипеди. Средствата се еднократни и пријавувањето е со фискална сметка и фактура.
Доколку проектот се покаже како успешен, наредната година вети Жерновски, ќе се одделат повеќе средства за велосипеди, затоа што со ова се заштитува животната средина, граѓаните ќе
дишат почист воздух, ќе се рекреираат и ќе се растерети сообраќајниот метеж.