Најгруба дезинформација е дека пазарчето Буњаковец ќе биде отсрането. Вака градоначалникот на општина Центар, Андреј Жерновски, реагира на написи во дел од медиумите.
„Криминалците од ВМРО-ДПМНЕ треба да пронајдат наводни скандали и афери каде што ги нема за да ги покријат своите скандали и афери. ВМРО-ДПМНЕ ги има и судството и полицијата и обвинителството. Ги повикувам да дојдат и да испитаат дали има некаков криминал во Центар“, рече Жерновски.
Она што предвидуваме со измените во ДУП-от е пристап на возилата до Буњаковец, осовременување на пазарчето и пробивање на улицата, може, рече Жерновски да има и бензиска, но за тоа што ќе има, ќе одлучуваат граѓаните на Центар.
Во врска со лицитирањето на можни имиња кои би работеле со бензиската пумпа, тој посочи дека земјиштето е во сопственост на Скопски пазар и тие ќе ја носат одлуката.
„Планот „Дебар маало 1“ допрва ќе се разгледува. Измените на ДУП-овите кои што ќе се разгледуваат летово нема да ги носиме ноќе, на јавна расправа ќе бидат два месеци.
Материјалот за ДУП-от „Дебар маало 1“ на советниците им беше поделен пред 3 недели, но почна да се пишува дента кога му испратив писмо на министерот за внатрешни работи, со барање за ургенција за уривање и прашав зошто штитат дивоградба во Крњево.
ВМРО-ДПМНЕ работи по познатата „држете го лоповот“, рече Жерновски.
Иако уредно поканети, со назнака дека Жерновски ќе одговара за наводната афера, медиумите кои пишуваа на „скандалот“ не дојдоа на денешната прес конференција.