Градоначалникот на општина Центар, Андреј Жерновски преку соопштение ја повикува министерката Гордана Јанкуловска, согласно Уставот и законите, да ги открие лицата кои со своето вандалско однесување ја демолираа салата на Советот на општината и ја уништија зелената надворешна површина.
Барам, вели Жерновски, министерката, почитувајќи ги Уставот и законите, да превземе и соодветни мерки на осуда и казна за овие лица.
Сторителите, посочува, на овие дела лесно ќе се пронајдат, бидејќи на сите снимки и фотографиите се гледа кој кршеше стакла и врата и кој маваше со камења по советниците, градоначалникот и медиумите.
Исто така бара да се лоцира вината на оние кои попречија одржување на седница на Советот на општината.
„Барам од министерката да објасни кој им нареди на припадниците на МВР да бидат неми набљудувачи на организираното дивеење, демолирањето на сопственост на сите жители на општина Центар и доведување во опасност на сигурноста на легално избраните советници, градоначалникот и медиумите. МВР, со своето неучество беше директен учесник во немилите настани. Сакам да нагласам, дека секогаш сум подржувал и ќе подржувам протести или друг начин на изразување на вољата на граѓаните, но тие треба да бидат ненасилни и со јасна порака и барање.Барам од миснистерката Гордана Јанкуловска, сериозно да го разгледа вчерашниот инцидент, во кој се уверија ипретставниците на меѓународната заедница, и согласно Уставот и законите да ги преземе неопходните мерки за казнување на сторителите, но и оние кои со своето сторување или несторување го дозволија ова дивеење“, вели Жерновски.
Инаку во општината денеска се отстрануваа последиците од дивеењето на групата, која се нарекува, заштитник на црквата.
