Андреј Жерновски, кандидатот на коалицијата „Сојуз за иднината“ вечерва објави победа во вториот круг од локалните избори во скопската општина Центар.
– И покрај Пустец, Голо Брдо, Мала Преспа, Центар вечер победи. Не победив јас и коалицијата, туку граѓаните на општина Центар, нивната гордост, чест, решителност и непоткупливост. Со победата на Центар почнува пролетта во Македонија, изјави Жерновски.
Шефот на изборниот штаб Игор Ивановски и на оваа, како и на првата прес-конференција повтори дека вториот круг избори биле кулминација на нерегуларности и презентираше видео материјал за да потврди, како што рече, дека имало фантомски гласачи дојдени од други градови и од соседна Албанија на гласачки места во општина Центар.
Свои сведоштва за гласачи кои не се жители на Скопје и на Македонија кажаа Радмила Шекеринска и Гордан Георгиев. Според нив, еден час пред затворањето на гласачките места, биле носени гласачи кои не знаеле ни зошто доаѓаат, ни каде се родени, ни каде е нивната адреса.
