Седумдесет и четири годишната Живка Димева од Свети Николе го загуби животот во тешка верижна сообраќајка што се случи вчера околу 18.30 часот на регионалниот пат село Миладиновци – Свети Николе, кај село Кадрифаково.
Во сообраќајната несреќа учествувале трактор управуван од Б.Д. (50) од Свети Николе, патничко возило комбе „фолксваген“ управувано од О.С. (33) од Штип, товарно возило „фиат дукато“ управувано од В.Б. (27) од Куманово и патничко возило „форд мондео“ управувано од Н.М. (23) од Штип.
Во сообраќајката со повреди се здобиле и возачите на возилата и сопатникот во товарното возило, информираат од МВР и подвлекуваат оти на сите им е укажана лекарска помош во Клиничкиот центар во Штип.
На местото на настанот полицијата изврши увид, во присуство на истражен судија и јавен обвинител и работи на расчистување на случајот.
