Здружението на пензионери „Карпош“ денеска во Кинотеката на Македонија го одбележа своето 35-годишно постоење. На манифестацијата присуствуваа претставници на сите седум ограноци на здружението, од Карпош 1 и 2, Карпош 3 и 4, Владо Тасевски, Тафталиџе 1 и 2, Козле, Нерези, Влае (Злокуќани, Бардовци), како и претставниците на здруженијата на пензионери од Тетово, Битола, Прилеп, Кичево, Неготино, Велес, Ѓорче Петров, Сојузот на здруженија на пензионери (СЗП) на Македонија, СЗП на Град Скопје и Црвениот крст на општина Карпош.
На манифестацијата присуствуваше и градоначалникот на општина Карпош Стевчо Јакимовски, кој истакна дека соработката на локалната самоуправа со ова здружение е на високо ниво. Тој нагласи дека и во иднина ќе ги поддржуваат во организација на спортските и рекреативни активности.
Во рамки на оваа манифестација беше промовирана и монографијата „Да не се заборави“, реализирана по повод 35-годишниот јубилеј. Беа доделени признанија и благодарници за присутните претставници на здруженијата на пензионери, за локалната самоуправа и за градоначалникот за неговиот придонес и ангажман во остварување на целите и задачите на ЗП „Карпош“.