Заврши протестот што поддржувачи на граѓанската иницијатива „Протестирам“ го одржаа вечерва во центарот на Скопје, преку кој побараа повлекување на одлуката од претседателот Ѓорге Иванов за аболиција на политичари, како и одложување на распишаните предвремени парламентарни избори за 5 јуни.
Протестот, како и во изминатите денови, почна пред седиштето на Специјалното јавно обвинителство (СЈО) чие работење граѓанската иницијатива го поддржува. Протестниот марш продолжи кон мостот „Гоце Делчев“ од каде од „Протестирам“ најавија дека ќе се упатат кон зградата на Уставен суд, но пристапот на мостот беше блокиран од полицијата, по што се упатија пред Владата. Во тек на протестот пред мостот демонстрантите фрлаа боја кон скулптурите лавови.
Учесниците на протестот бараат и оставка од Иванов, вклучување и присуство на независни претставници на граѓанското општество во решавањето на кризата и формирање преодна влада која целосно ќе ги имплементира итните реформски приоритети од извештајот на Прибе.