Заврши конкурсот и од утре може да се гласа за предлозите за логото на македонското друштво „Илинден“ по повод 10-годишнината од неговото формирање.
На конкурсот кој друштвото го објави кон крајот на јули се бараше логото да ги одразува досегашните активности на оваа асоцијација.
-Како најадекватни се избрани трудовите на Мартин Бибовски од Скопје и господинот Петковски од Канада. Но кој од нив ќе биде избран сепак ќе одлучат нашите ценети пријатели бидејќи за предлозите ќе се гласа од 1 до 21 јануари 2017 година. Победник ќе биде оној што ќе собере најмногу лајкови на профилот на фејсбук на Македонско друштво “Илинден”-Tирана и од страна на посебна комисија, вели Никола Ѓурѓај претседател на друштвото.
Предлогот на Бибовски, објаснува тој, е во облик на округло лого во стил на монограм, со двете бои на знамето на Македонија. Во центарот е претставен обликот на споменикот „Македониум“ во Крушево, како симбол на празникот Илинден и во преден план е истакнато „10 години“ со сонцето од Кутлеш во нулата. На рабовите е испишано името на друштвото на македонски и албански јазик.
Во предлогот на Петковски, вели Ѓурѓај, во центарот е сонцето од Кутлеш, знак кој ги обединува сите Македонци каде и да се и во преден план е истакнато „10 години“. Името на друштвото е напишано на македонски јазик.
Логото ќе се користи во сите официјални документи и сите активности на Македонско друштво „Илинден” од 1 февруари 2017 до шести февруари 2018 година.