Градежната инспекција на општина Центар денеска со решение го затвори градилиштето на фирмата Настел на бизнисменот Зоран Азманов. Поради огромната јама која што е ископана, а не заштитена, пропадна улицата 8-ма Ударна Бригада, отворена е дупка во градилиштето и е нарушена стабилноста на околното земјиште. На оваа улица се наоѓа Италијанската амбасада и постои реална опасност и за возилата и за пешаците.
Надлежните му наложија на инвеститорот да ја обезбеди на градежната јама. Оттаму добија уверување дека во најкраток можен рок ќе го сторат истото.
Општина Центар улицата 8-ма Ударна Бригада целосно ја реконструираше пред нецела година. Поради опасност од поткопување на улицата и оголување на инсталациите неколку пати беше предупредена компанијата Настел да го реши проблемот со огромната ископана дупка која веќе е претворена и во вистинска депонија.
Азманов во 2012-та година има добиено правосилно решение за изградба на два објекта за деловни намени. Тоа значи хотел или трговски единици. Едниот објект треба да биде висок 22 метри, а вториот 16,5 метри.
Согласно законот за градење, фирмата поради загрозена сигурност на околните градби и стабилноста на земјиштето ќе биде казнета со глоба од 2000-4000 евра, а одговорното лице со казна од 1000-2000 евра.
