Надлежните органи во соработка со локалната самоуправа на Охрид започнаа со активности на извлекување и расчистување на бротчето „Мис Стон“ од каналот Студенчишта на Охридското Езеро.
Според портпаролот на општина Охрид, Томи Џамтоски екипи на општинските јавни претпријатие прво ќе ја испумпаат водата од внатрешноста на бродот, по што тој целосно ќе биде извлечен на суво и дислоциран.
Од надлежниот инспекторат и Капетанијата најавија дека ќе се бара одговорност, а роднина на сопственикот на бродот, кој што се наоѓа во странство, изјави дека при реконструкцијата на кејот долж каналот, бротчето било преместено без знаење и согласност на сопственикот, кога дошло и до оштетување.
– Петнаесет години бротчето се наоѓа во каналот. Тоа беше закотвено на друга локација. Тие на своја рака го преместувале и го оштетиле. Чија е сега одговорноста и кој ќе ја надомести штетата, изјави тој.