Ноќеска, околу 3 часот по полноќ, целосно изгоре автомобилот на Ѓорги Галетановски – Чомбе, претседател на скопската организација на СДСМ и поранешен директор на Зоолошката градина.
Возилото било паркирано пред зградата во која живее во општина Кисела Вода. Граѓани слушнале детонации од пукнати гуми, а противпожарна екипа брзо интервенирала и го изгаснала огнот. Галетановски го потврди настанот.
– Да,возилото мое е изгорено целосно. Ниту сум скаран со некој, ниту некој ми се заканувал. Секоја чест на пожарникарите што пристигнаа за три минути и пламенот не ги зафати куќите. Апелирам до министерот и до Министерство за Внатрешни Работи и надлежните најскоро да го најдат сторителот, не поради финансиска загуба поради мирен живот во Скопје и цела држава на сите граѓани. Има и сејф сити и камери окулу, да се надеваме дека мирот ќе биде вратен, напиша Галетановски на социјалните мрежи.
Реагираше СДСМ.
– СДСМ најостро го осудува криминалниот чин и палењето на возилото на претседателот на Градската организација, Ѓорѓи Галетановски. Со доаѓањето на ВМРO-ДПМНЕ на власт безбедноста на граѓаните е сериозно загрозена. МВР наместо да се занимава со тоа како лица блиски до ВМРО-ДПМНЕ да земат милионски тендери нека земе конечно нешто да работи. Бараме МВР и сите надлежни институции веднаш да постапат, целосно да го расчистат случајот и сторителите да одговараат, се вели во соопштението од партијата.