За во 21.30 часот е закажана седница на Комисијата за прашања на изборите и именувањата на која треба да се утврде предлог кандидатот кој ќе ја извршува функцијата специјален јавен обвинител. Претседателот, Ѓорге Иванов, го потпишал указот и законот се враќа назад за да продолжи работата на Собранието.
„Согласно процедурата законот е потпишан од претседателот Иванов и е предаден во Собранието“, изјавија од кабинетот на Иванов.
Од 18.00 часот денеска пратениците го чекаат потписот на Иванов. Предлог кандидатот треба да помине низ комисиска расправа, а потоа да го изгласаат и мнозинството пратеници на пленарна седница. При тоа потребно е да се запази бадинтеровото мнозинство.
Специјалниот јавен обвинител ќе биде задолжен за гонење на кривични дела поврзани и кои произлегуваат од содржината на неовластено следење на комуникациите. Откако Собранието ќе ја донесе одлуката, вечерва се очекува да ја потврди и Советот на јавни обвинители.