Во духот на европското единство, предизвиците и можностите претседателката на Либерално-Демократската партија, Моника Зајкова во Брисел се сретна со влијателниот Жорж-Луј Бушез, лидер на Движењето Реформатор.
Двајцата лидери изразија оптимизам за процесот на проширување, нагласувајќи ја важноста да се направи ова час поскоро. Пристапувањето во фази е исто така чекот кој може да го врати оптимизмот на земјите-членки.
-Нашиот состанок е доказ за кооперативниот дух на европските лидери. Ние стоиме заедно во замислата за Европа која постојано се реформира и проширува согласно своите идеали, инклузивност и потенцијал, рече Зајкова.
Бушез на средбата со Зајкова ја истакна важноста од континуиран, стратешки и обмислен процес на проширување на Европската унија како и прифаќање на нациите кои споделуваат европски идеали и вредности, за поттикнување на единството и зајакнување на европскиот проект.
Друга клучна точка беше неспорното значење на либералите во обликувањето на Европа.
Зајкова и Бушез се осврнаа на тоа дека либералната агенда, со нејзиниот фокус на индивидуалните слободи, отворен пазар, даночни и социјални реформи и борбата против корупцијата, продолжува да игра клучна улога во креирањето на подобар систем и модерна, прогресивна Европа.
Точка на разговор беа и Европските избори и изборите во Белгија, како и можностите за трговска и образовна соработка меѓу Македонија и Белгија.