Кандидатот за градоначалник на ВМРО-ДПМНЕ за Општина Штип, Илчо Захариев на денешната прес-конференција најави изградба на нова зграда на Противпожарната единица, која ќе биде лоцирана меѓу населбите „8 ми Ноември“ и „Баби“, во близина на ОУ „Тошо Арсов“.
Захариев смета дека мора да се изгради нов објект за штипските пожарникари, бидејќи во текот на поплавите локалната власт и институциите го увидиле нивниот голем ангажман во справувањето со штетите и големата помош која ја дале на граѓаните.
– Бидејќи локацијата, каде што сега е Противпожарниот дом е навистина едно место каде што е многу населено, излезноста е мала и е тесно грло на овој простор, бидејќи планираме реновирање и изградба на нов булевар „Партизанска“ и локацијата која што е само на 50 -тина метри од местото каде што ќе биде овој булевар, ќе направиме екипата на Противпожарниот дом да биде мобилна, да биде ефикасна и во функција на граѓаните, рече Захариев.
Тој истакна дека проектот е реален, бидејќи чини 500.000 евра, од кои 250.000 евра ќе ги обезбеди општината, а останатите средства преку други извори и донации.
Директорот на ЈП „Штип проект“, Александар Шумански најави дека веќе се работи на главниот проект и на урбанистичкиот план за Противпожарниот дом, а веќе за неколку месеци ќе биде одобрена и градежната дозвола за почеток на изградбата на новиот објект на Противпожарниот дом.
Командирот на ТППЕ-Штип, Кире Патраклиски потенцира дека е горд што Штип ќе добие нова зграда на Противпожарниот дом, кој ќе биде и регионален центар за обука на пожарникарите.