Вчера во хангар во штипското село Ерџелија се случила несреќа во која животот го загубил 58-годишен работник од Свети Николе, информира Министерството за внатрешни работи.
„На 29 август во 9 часот било пријавено дека во с.Ерџелија-штипско, во хангар од работна машина-виљушкар управувана од С.А.(54) бил прегазен М.Г.(58) од Свети Николе, кој на пат за Медицинскиот центар Штип починал,“ се вели во полициското соопштение.
Извршен бил увид на местото на настанот од Јавен обвинител и увидна екипа од Полициската станица Свети Николе. По наредба на Јавен обвинител телото на починатиот било дадено за обдукција, додаваат од полицијата.
Пред само десетина дена, 60-годишен работник загина при работа со градежна машина во рудникот Суводол на РЕК Битола.
Според податоците на Македонско здружение за заштита при работа, од 2007 година наваму, во континуитет околу 40 до 50 работници во Македонија годишно го губат животот на работното место, што значи дека во просек секоја недела гине по еден македонски работник.