Забележлива е порелаксирана атмосфера меѓу граѓаните во Македонија, продолжете со политиките што обезбедуваат перспективи, му порача денеска високиот комесар на ОБСЕ за национални малцинства Ламберто Заниер на премиерот Зоран Заев.
На средбата во Владата на која присуствуваше и министерката за образование и наука Рената Дескоска, Заниер оцени дека интеграциите на Македонија се важни за стабилноста на државата и дека Македонија се движи во добра насока.
Претстојните локални избори, пак, заеднички констатираа соговорниците, се важни за натамошниот демократски развој на Македонија.
– Се определивме за концептот едно општество за сите, што се покажа успешен зашто сите граѓани сакаат да живеат квалитетно, со своите семејства и блиските, во родната земја. Ние се грижиме за практичните потреби на сите граѓани, согласно Уставот и така ќе продолжиме да работиме, бидејќи знаеме дека секој човек е важен и само ваквите политики на посветеност кон граѓаните и изградба на мостови носат добра иднина и просперитет на државата, рече премиерот Заев.
Заев додаде дека Република Македонија е определена и кон продлабочување на пријателствата и соработката и во регионални рамки и оцени дека во регионот постои позитивна клима што може да обезбеди исчекор кон развој на сите држави и нивните граѓани.
– Да се посветиме конечно на економијата, зашто граѓаните тоа го очекуваат од нас, рече премиерот Заев на средбата со Заниер.