Делегација на СДСМ предводена од претседателот Зоран Заев, во која беа Оливер Спасовски, секретар на партијата и министер за внатрешни работи и Едмонд Адеми, член на Извршен одбор, утрово остварија средба со претставници од Советот за македонското национално малцинство на Град Загреб и невладината граѓанска организација „Хрватско-македонска тангента“.
Македонските гости беа запознати со организираноста и структурата на македонската дијаспора во Хрватска, со образованието на Македонците на мајчин јазик, со постоењето на претставник на Македонската православна црква и изградба на во Хрватска, како и со сите досегашни дострели на македонската дијаспора во Хрватска во доменот на кулура, стопанство и медиумска застапеност.
„Македонците во Хрватска се одлично примени и со успех ги користат многубројните права коренспондираат со нормите на членките на ЕУ. Капитална добивка е тоа што македонскиот јазик кој се изучува како изборен предмет во Хрватска преку сведителствата каде е наведен под уставното име е влезен во ЕУ, истакна Томе Апостолоски, претседател на Советот за македонско национално малцинство на град Загреб.
Гостите се информирани за актуелната политичка и економска ситуација во Хрватска, за напорите што Македонците преку своите организации и здруженија ги прават за унапредување на односите помеѓу Република Хрватска и Република Македонија во разни сегменти на животот.
Претседателот на СДСМ, Заев, на средбата посочи дека целиот процес што во моментот се случува во Македонија е насочен кон враќање на вистинските вредности и критериуми за функционирање на демократијата, а не да биде присутна и пресудна партиската припадност.
„Можеме, а и треба да бидеме подобра земја за нас, но и за ЕУ каде претендираме. Сите ние во Македонија треба да се помириме, да си подадеме рака“, рече Заев.
Се очекува во текот на денот Зоран Заев со делегацијата да оствари средба со Зоран Милановиќ, претседател на сестринската хрватска партија СДП, како и со поранешниот председател на РХ, Стипе Месиќ.