Зоран Заев вечерва пристигна во Белград, каде што утре се очекува да се сретне со претседателот на Србија, Александар Вучиќ и со српската премиерка Ана Брнабиќ. На аеродромот „Никола Тесла“, македонскиот премиер беше пречекан од српскиот министер за иновации и технолошки развој Ненад Поповиќ.
Поповиќ е српскиот министер чие што име се споменува во „Рајските документи“. Според документите што излегоа од две агенции за оф шор услуги од Бермудските Острови и Сингапур, покажуваат дека Поповиќ поседува имот што вреди најмалку 75 милиони долари, а дека неговата пазарна вредност е повисока од 100 милиони долари, со што тој убедливо е најбогатиот српски политичар.
Заев на средбите со српските лидери утре ќе разговара за унапредување на билатералните односи помеѓу двете земји, европскиот пат на Македонија и Србија, како и за зајакнување на економската соработка.
Премиерите на Србија и Македонија ќе разговараат за начините за унапредување на односите на двете земји, по што ќе одржат пленарна седница, а предвидена е и заедничка прес конференција на Заев и Брнабиќ.
Ова е прва посета на Заев во Србија од кога стана премиер и по напнатоста во билатералните односи, која кулминираше кон крајот на август со повлеквањето на целиот персонал од српската амбасада во Скопје.