Повторувањето на екстерното тестирање, не по вина на учениците, туку поради процедурални грешки на Министерството за образование, кое е организатор на тестирањето, е катастрофално и горчлива последица на новиот бран на промени на власта, смета лидерот на СДСМ, Зоран Заев.
– Новиот бран од ВМРО ДПМНЕ, еве, какви последици носи. Знаете колкав беше стресот кај учениците во основното и средното образование со екстерното тестирање и се надевам дека вакви работи во иднина нема да се случуваат. Ова е катастрофално. Да се повтори екстерното тестирање, не по вина на учениците, туку од процедурални грешки на министерството за образование како организатор на екстерното тестирање, е навистина катастрофално. Еве, дечињата се веќе на распуст, како тоа ќе им го објасниме на нивни години дека е добро за нив. Но, новиот бран на промени еве какви резултати носи, најверојатно тоа е причината, бидејќи ова е едно од министерствата каде што се случуваат промените, но сепак се надевам дека целиот процес ќе помине безболно – порача лидерот на СДСМ.