Лидерот на опозицијата предводена од СДСМ Зоран Заев за време на денешниот престој во Битола истакна дека новата македонска влада ќе се формира врз темелите на Европската Конвенција за човекови права.
Заев апелираше институциите да работат слободно, а граѓаните да не дозволат да бидат манипулирани бидејќи, како што рече, Македонија веќе влегува во мирни води.
– Европската Конвенција за човекови права овозможува да ја користат и уживаат сите граѓани на Европа и тоа е иднината на Република Македонија. Оваа Европска Конвенција за човекови права ќе биде основата на идното дејствување на новата Влада на Република Македонија. Европската Конвенција за човекови права ќе биде платформата врз основа на која ќе се создаде новото парламентарно мнозинство и основата на дејствување на идната Влада на Република Македонија. Граѓаните треба да знаат дека оваа европска конвенција ќе биде водилка за современата македонска држава, ќе се водиме од овие права што ги почитува цел демократски свет. Апелирам за спокој, единство и сплотеност. Државните институции имаат обврска да донесат транспарентна одлука. Не ни требаат делби ни поделби, тоа време заврши, изјави Заев од Битола.