Лидерот на СДСМ Зоран Заев од Велес ги повика сите слободоумни граѓани да соберат храброст и да не се плашат бидејќи оваа власт мора да замине.
„Доказите за грдото лице на Груевски и на оваа власт се во наши раце. Нашите бомби се со докази и како што Гемиџиите некогаш со бомби го тргнаа теророт така и ние со нашите бомби ќе го тргнеме. Ова ропство ќе замине“, рече Зоран Заев.
Заев говореше за тешката економска состојба во Македонија кога кредити се надвиснати над сите граѓани, кога сите сме во долгови и кога ѓаволски тешко се живее бидејќи власта само зема арач, ги затвора дуќаните, а и земјоделците лошо живеат.
„Медиумскиот протстор е под тотална контрола, тие ги купуваат медиумите кои треба да бидат колектив на власта. Понижувачка е и состојбата во образованието, екстерно ќе има, но за Груевски и за Владата. Не ни чинат работите, затоа не смееме при очи да бидеме слепи, при уши, глуви, а при очи слепи. Не треба никој да се избори за нас, сами треба тоа да го направиме“, рече Заев.
Тој посочи дека во парламентот не се враќаат не од инает туку поучени од потезите на Власта.
„Со стевчовци и бучковци ќе има само контролирана опозиција и тотална диктатура. Ние ќе докажеме колку безобразно власта злоупотребува се за да остане на власт. Во Парламентот не се враќаме се додека не се нормализира состојбата“, рече Заев.