На овие избори ќе ја „избургијаме“ победата, порачаа на денешната средба Бургијашите на која присуствуваа лидерот на СДСМ и градоначалник на Струмица, Зоран Заев и лидерот на ЛДП и градоначалник на општина Центар, Андреј Жерновски.
Со вашето постоење, им порача Заев на Бургијашите, испраќате чиста порака на охрабрување за да престане апатијата и безидејноста.
„Ви се восхитувам на слободоумноста и храброста. Мора дебата и разговор. На наредните избори власта ќе изгуби, а опозицијата ќе победи. Подготвени сме на периодот што доаѓа. Оние од власта мора да знаат дека по изборите парите ќе мора да ги вратат, да ги вратат парите кои ги испљачкаа од народот. Вие сте порака на охрабрување“, рече лидерот на СДСМ и градоначалник на Струмица, Зоран Заев.
Лидерот на ЛДП и градоначалник на Центар, Андреј Жерновски порача дека со власт која ги крши човековите права и слободата на медиумите, во време кога имаме диктатура, Бургијашите се неоходни.
„Битката ќе биде тешка. Формулата за успех е тоа што Заев го направи во Струмица а јас во Центар. Тоа треба да биде направено на ниво на цела држава“, рече во своето обраќање пред Бургијашите и отпорашите, Жерновски.
Жерновски вети дека на следните избори опозицијата во Центар ќе ја зголеми победата, а опозицијата ќе победи на следните избори.
„Паѓа владата“, порачаа Бургијашите на денешната средба.