Градоначалникот на општина Центар ги демантира информациите во некои медиуми во врска со вчерашната седница на Советот на општината.
„Предлагач на 4-те Детални урбанистички планови е претседателот на Советот. Затоа, политичка манипулација е барањето на советничката група на ВМРО-ДПМНЕ, градоначалникот да биде задолжително присутен на седницата.
Според Деловникот на општината, градоначалникот е должен да присуствува на седницата кога е предлагач на точка на дневен ред. Во времето кога се одржуваше седницата јас ги извршував редовните, однапред планирани обврски. Една од нив беше и средбата со мисијата на ОБСЕ, предводена од амбасадорот Ралф Брет, кој меѓу другото изрази загриженост поради притисоците кои се вршат врз општина Центар. Во четвртокот имаше нова инспекција во општината, овој пат управна, и казнет сум со нови 3.000 евра од трудова инспекција.
Манипулациите и притисоците во врска со работата на општина Центар мора да престанат, да се остави општината нормално да функционира за да продолжи да ги исполнува ветувањата и задачите поради кои и жителите на Центар ја дадоа довербата на актуелното раководство“, стои во реакцијата на градоначалникот на општина Центар, Андреј Жерновски.