Комисијата за заразни болести предлага полицискиот час да се скрати за еден час и да почнува од 21 часот, за Велигден и Рамазан воопшто да нема ограничување на движењето и отворање на летните тераси во сите угостителски објекти. Новите ограничувања се предложени за периодот од 28 април до 15 мај.
„Утре од Владата ќе побараме согласност за овие мерки. Да се отворат летните тераси на сите угостителски објекти, полицискиот час да се скрати и да почнува од 21 часот. За Велигден и Рамазан да нема полициски час, а угостителските објекти да работат до 20 часот односно до 20.30 минути“, рече министерот за здравство Венко Филипче.
Укинувањето на полицискиот час за Велигден и Рамазан, министерот Филипче вели дека е заради чувството на граѓаните.
„Да потенцирам, здравствената состојба ја дозволува оваа мерка. Верските заедници, на состанокот минатата недела, земаа обврска се што може да организираат надвор и да водат сметка за почитување на протоколите“, рече министерот Филипче.
Овие мерки, тој образложи дека се предлагаат поради очигледното олабавување што се чувствува не само кај нас туку и во сите околни земји. Намален е бројот на приеми во болниците, од 200 кога сме имале најмногу, вчера имало 69 приеми во болниците, а намален е и бројот на пациенти на болничко лекување. Најголемата бројка била 1789 хоспитализирани пациенти која сега е симната на 1400.