Основното јавно обвинителство поднесе обвинение за кривично дело-убиство против 22-годишното момче од село Петровец кое на 9-ти јануари ја задави медицинската сестра на поткровјето од Детска клиника. Од ОЈО велат дека лицето е обвинето затоа што со умисла ја лишил од живот покојната.
„Обвинетиот знаел дека жртвата е бремена. Тој делото го извршил по претходна вербална расправија, по што со употреба на сила ја турнал сега починатата на подот. Жртвата при падот удирајќи со главата на подот, се здобила со повреда која не била животно загрозувачка. Користејќи ја состојбата во која оштетената, поради повредата, не можела да дава отпор, обвинетиот со едната рака ја фатил за вратот и почнал да ја стега, а со другата рака во исто време и ги затнал носот и устата, давејќи ја се додека не престанала да покажува знаци на живот. Како резултат на насилното задушување кај оштетената настапила смрт“, посочуваат од јавното обвинителство.
Медиумите дента по убиството известуваа дека на чинот му претходела вербална расправија. Медицинската сестра била убиена во затворениот дел, по што момчето го изнело телото на отворено и застанал на самиот раб на покривот каде бил забележан од случаен минувач. Жртвата и обвинетиот биле блиски познаници и живееле на иста адреса. По убиството 22-годишникот го призна делото во полиција, по што му беше одредена мерка притвор од 30 дена.