Почесниот конзулат на Република Словенија во Република Македонија со седиште во Битола е времено затворен, и истиот во секое време може да се реактивира, изјави за МИА почесниот словенечки конзул во Битола, Мишко Мојсов.
Почесниот конзулат на Словенија во Битола беше отворен пред една деценија и до овој момент успешно ги извршуваше сите задачи од надлежност на конзулатот, посочи Мојсов.
– Временото затворање на почесниот конзулат не е невообичаена работа и истиот најверојатно повторно ќе биде отворен кога ќе се зајакнат економските активности и соработка, а во најава се и други планови и проекти за кои е потребна дипломатска поддршка. Лично сметам дека овој кризен период брзо ќе биде надминат и дека конзулатот ќе биде рестартиран, истакна Мојсов.
Инаку, неодамна во Битола беа затворени почесните конзулати на Република Хрватска и на Велика Британија, но, в понеделник ќе биде отворен нов конзулат на Босна и Херцеговина, а за почесен конзул на таа држава во Битола е назначена и ќе биде промовирана познатата македонска пејачка Билјана Дамјановска Јанчевска, која во моментов има своја нотарска канцеларија во овој град.