Кутијата со златен накит, одземена при тешка кражба пред неколку дена во тетовското село Боговиње, синоќа била вратена во дворот на домот од каде е украдена.
Како што информира портпаролот на СВР Тетово Марјан Јосифовски, Ф.А. (43) половина час по полноќ пријавил во полиција дека во дворот ја пронашол кутијата со накит украдена ноќта меѓу изминатиот вторник и среда.
Според неговата пријава Ф.А. заедно со уште еден негов пријател се враќал дома кога во дворот ја забележал кутијата со накит вреден околу десет илјади евра. При полицискиот увид кутијата и накитот биле фотодокументирани и вратени на сопственикот.
При кражбата од пред четири ноќи заедно со кутијата со накит засега непознатите сторители одзеле и околу 4.100 евра, два рачни часовници од кои еден позлтен и нож кои не се вратени. Полицијата работи на расветлување на случајот посочи Јосифовски.