Основниот суд во Струмица денеска го осуди 18-годишниот струмичанец И.Ч. на казна затвор во траење од 15 месеци заради прегазувањето на Верица Белчовска од беровско Русиново.
Сообраќајната несреќа се случи на 7 април, годинава на булеварот „Ленинова“ во Струмица во 19:40 часот, кога момчето кое возело автомобил марка „нисан“ удрило во Верица која преминувала на пешачки премин. Возачот избегал од местото на несреќата, а подоцна, истиот ден, сам се пријавил во полициска станица.
Според судијката Цона Каламерникова, обвинетиот пред судот ја признал вината за стореното дело, а казната на момчето му е изречена за сторени кривични тешки дела против безбедноста на луѓето и имотот во сообраќајот и неукажување помош на лице повредено во сообраќајна незгода.
По загинувањето на 20-годишната Верица, семејството ги донираше нејзините органи, кои спасија три животи.
