На железничкиот премин Превалец на пругата Велес-Битола утринава се случи несреќа во која е повредено едно лице.
Несреќата се случила во 7:05 минути кога камион удрил во воз кој се движел од Битола кон Скопје при што со повреди се здобил возачот на камионот.
До несреќата, како што информираат од Македонски железници Инфраструктура, дошло поради непочитување на сигнализацијата на патниот правец.
– Во моментот на незгодата сигнално-сигурносниот уред за осигурување на патниот премин со светлосна и звучна сигнализација работел стабилно, што е потврдено и од Комисијата за иследување на вонредни настани од ЈП МЖ Инфраструктура, која излезе на лице место веднаш по инцидентот. Тоа наведува до сознание дека до инцидентот дошло поради непочитување на сигнализацијата на патниот премин, од засега неразјаснети причини од страна на возачот на камионот, заради што и практично патното возило удрило во првата кола од дизел моторната гарнитура, се вели во соопштението од МЖ Инфраструктура.
Имајќи предвид дека неколкупати досега вакви несреќи се случуваат на овој правец поради непочитување на поставената сигнализација, од МЖ Инфраструктура најавуваат враќање на старите механички рампи.
На пругите во Македонија постојат 288 патни премини. Од нив, 203 се обезбедени само со друмска сигнализација, а преостанатите 85 патни премини, меѓу кои спаѓа и патниот премин Превалец, се осигурани со сигнално-сигурносни уреди.