Водата од градскиот водовод во Струга не е безбедна за пиење, соопшти Центарот за јавно здравје – Охрид.
Од таму велат дека и најновите контролни анализи на водата за пиење од градската водоводна мрежа покажале дека водата е загадена.
„И контролните анализи на водата за пиење од градската водоводна мрежа во Струга извршени вчера, по однос на параметарот резидуум хлор (дезинфекционо средство) и матност, што ги изврши Центарот за јавно здравје – Охрид, покажаа дека водата од градскиот водовод содржи доволно количество дезинфекционо средство (резидуум хлор), но матноста е сè уште над законски дозволената и пропишана вредност“, соопшти ЦЈЗ Охрид.
Од таму појаснуваат дека ова значи оти водата од градскиот водовод во Струга сè уште не е здравствено безбедна за пиење.
„Состојбата постојано се следи и јавноста ќе биде известена кога состојбата со квалитетот на водата ќе се нормализира“, велат од Центарот за јавно здравје Охрид.