Напукнатиот канал на Хидросистемот „Брегалница“ кој поминува низ населбата „Шатровиќ“ во Кочани им ги наполни со вода домовите, подрумите и гаражите на жителите на улицата „Киро Кикенски“.
Водата која што непрекинато тече навлезе во домовите на луѓето кои реагираат и барат санирање на оштетениот канал или запирање на водата за наводнување.
Од Водостопанство на Македонија подружница „Брегалница“ Кочани ја признаваат вината за настанатиот проблем и велат дека раководителот на одржување бил на лице место за спроведување акција за санирање на штетите но веројатно не е санирано квалитетно, па каналот повторно попуштил.
– Целосно ја разбирам настанатата состојба со десетина куќи во атарот на улицата „Киро Кикенски“ во населбата Шатровиќ каде што имаме пукнатини на каналот. Доколку се укаже потреба за сопирање на водата, ние целосно ќе се зафатиме за санирање на состојбата на каналот кој патем да кажам е стар 40 години, изјави Николчо Гоцев, директор на Водостопанство „Брегалница“ од Кочани.
Гоцев информираше дека до почетокот на наводнителаната сезона биле регистрирани 100-тина пукнатини од кои 20-тина се целосно санирани.