Министерот за внатрешни работи, Оливер Спасовски изрази загриженост и го осуди нападот врз поранешниот пратеник и министер за здравство, Никола Тодоров. Според него, партизацијата на виталните институции довела до тоа граѓаните да ја изгубат довербата.
– Ги осудувам сите кривични дела и секое загрозување на безбедноста на граѓаните и државата, ќе преземам активности, институциите мора да работат во интерес на граѓаните. Доколку било кој носител на функција сторил кривично дело против него ќе се води кривична постапка, рече Спасовски.
Тој упати повик до сите граѓани да не преземаат никакви дејствија со кој ќе го загрозат сопствениот живот и животот на другите и рече дека МВР ќе ги превземе сите надлежности да го разреши денешниот случај.
На новинарски прашања, министерот Спасовски истакна дека разговарал со работната група на МВР за настаните од крвавиот четврток и дека се уште не е готов извештајот, но штом ќе биде, тој ќе го сподели со јавноста.