Уште непочната седницата на Комисијата за европски прашања, се направи хаос. Потпретседателката Арта Биљали-Зендели побара претставникот на Владата да се произнесе за амандман, а пратениците на ВМРО-ДПМНЕ бараа процедурално обраќање. Кога Биљали-Зендели не дозволи, тие почнаа да тропаат по масите. Во салата нема никаков ред, а претставникот на Владата не можеше ни да почне да зборува.
Пратеничката Дафина Стојановска застана пред пултот на Биљали-Зендели, а по неа дојдоа и други пратеници. Сите бараат процедурално обраќање, а не разгледување амандмани.
„Не се плашам, сите дојдете овде, нека гледа народот“, рече Биљали-Зендели, а пратениците од ВМРО-ДПМНЕ вратија: „А бе кој те плаши, треба да дадеш процедурално!“
Жестока реакција имаше и од Гордана Силјановска-Давкова, која бараше збор, а не доби.
„Никој овде не е професор, тука сме како пратеници. Одиме понатаму“, рече Биљали-Зендели.
Биљали-Зендели се жалеше дека нема приватност и дека пратениците ѝ гледаат кој ѝ се јавува на телефон бидејќи стојат околу неа.
„Срамота, немаш општа култура. Ти не може да чуваш ни податок кој ми се јавува“, додаде таа.
Седницата повторно се одложи.