Со средства од буџетот на општина Виница и од Европската инвестициска банка денеска во селото Трсино почна изградбата на нова филтер станица за вода.
Со оваа капитална инвестиција чија вредност е над 10,5 милиони денари, до крајот на годината за над 250 семејства ќе биде обезбедена чиста и квалитетна вода за пиење.
На поставувањето на камен-темелникот на објектот, градоначалникот на Виница, Ивица Димитров рече дека покрај филтер станицата, ќе се изгради целосно нов резервоар за вода, а ќе се реконструира и постојниот цевковод по кој водата ќе се носи до домовите.
– Поради застарениот начин на изградба на постојните извори, досега во поголем дел од годината доаѓаше до заматување на водата и таа не одговараше ниту на минималните стандарди за исправност. Со новата инвестиција ќе обезбедиме пречистување со грубо и фино филтрирање, како и дезинфекција, со што жителите на Трсино ќе добијат санитарно исправна вода за пиење, истакна градоначалникот Димитров.
Со изградбата на филтер станицата и реконструкцијата на главната водоводна линија ќе се избегнат загубите на вода од изворот, а општината ќе ги намали трошоците за поправки и одржување. Заштедените средства ќе се пренаменат за решавање на другите комунални прашања во Трсино.