Општинската изборна комисија во руралната општина Карбинци се подготвува утре членовите на избирачките места да ги транспортира со џипови, доколку заглават во кал напомош треба да им пристигнат и трактори со салји, со цел навреме да се отворат три избирачки места на планината Плачковица.
Претседателот на ОИК-Карбинци Делчо Стоилов изјави дека постојаните врнежи од дожд во овој регион ги направија непристапни земјените патишта до три планински села.
– Тоа се избирачките места 2327 во Голем Габер, 2323 Руљак и 2330 во Оџалија. За селото Оџалија делумно е асфалтиран патот, делумно е земјен коловоз, додека за Руљак и за Голем Габер е земјен коловоз, нема ниту интервенирано за поправки и одржување на овие две места, рече Стоилов.
Во општина Карбинци денеска гласаа 23, а во Штип 217 болни и изнемоштени лица. Во Затвор Штип гласањето се одвива без проблеми, право на глас имаат 164 осуденици. Во раните утрински часови е забележана голема излезеност на затворениците кои имаат право на глас и кои се евидентирани во избирачкиот список.
Заменик-претседателот на Избирачкиот одбор во Затвор-Штип, Влатко Конев, изјави дека до 12 часот гласале 106 осуденици.
Во 13 општини во источна Македонија, од Лозово до малешевско-пијанечкиот регион, право на глас имаат 162.403 гласачи, а на списокот за иселени регистрирани се 8.818 лица. Во овие општини има вкупно 373 избирачки места.