Дваесет и четири странски државјанки со нерегулиран престој или нелегално вработување и 84 девојки од нашата земја биле откриени во 16-те акциски и петте редовни контроли на 20 угостителски објекти што ги спровела полицијата лани во тетовско-гостиварското подрачје, информира портпаролот на СВР Тетово Марјан Јосифовски.
Најголем број од откриените странски државјанки биле од Србија- девет, од Албанија – осум, а имало и од Бугарија и Косово кои во објектите биле ангажирани како танчерки, пејачки или друг угостителски персонал. Девојките од нашата земја најчесто биле на возраст од 20 до 35 години.
– Поради нерегулиран престој или нелегално вработување на странските државјанки им се поднесени соодветни пријави, по што им се изречени прекршочни санкции и глоби, како и безбедносни мерки за забранет влез во земјава од три до пет години и депортирање во нивните матични земји, рече Јосифовски.
Минатата година, според Јосифовски, во полошкиот регион во седум акциски и 42 редовни контроли откриени се и 102 странски државјани претежно „економски емигранти“ кои непријавено или нелегално на подрачјето извршувале сезонски полски или градежни работи најчесто во селата.
– Од нив 94 биле од Република Албанија, двајца од Република Косово и шест од Република Србија. Тие се соочиле со пријави, судски прекршочни санкции, глоби и безбедносни мерки за забранет влез од една до три години и депортација во матичните земји изјави Јосифовски.