Вчера вечер во 18.00 часот во Полициската станица Кавадарци било пријавено дека на магистрален пат Градско-Прилеп се случила сообраќајна несреќа, информира МВР.
Во сообраќајката учествувале товарно возило „волво“ со приклучно возило, со светиниколски регистарски ознаки, управувано од 48-годишниот С.Л. од Свети Николе, патничко возило „голф“, со прилепски регистарски ознаки, управувано од 39-годишниот Д.К. од Прилеп и патничко возило „бмв“, со битолски регистарски ознаки, управувано од 30-годишниот Д.Ј. од Битола.
Како што информира Министерството, по несреќата, возачот Д.К. и сопатниците од неговото возило П.К.(38) и малолетник, двајцата од Прилеп, биле пренесени во Општата болница во Кавадарци каде Д.К. починал, додека кај сопатниците биле констатирани тешки телесни повреди.
По наредба на Јавен обвинител телото на починатиот било дадено за обдукција. Увид извршила увидна екипа од Полициска станица Кавадарци.
