Двајца грчки државјани се повредени во сообраќајната несреќа што се случи утрово во 9 часот на делницата од автопатот Велес–Градско на 2,8 километри од наплатната рампа.
Според информацијата од Анита Стојковска, портпарол на СВР Велес до несреќата дошло кога патнички автомобил џип марка „БМВ Х-6“ со германски регистерски ознаки управуван од 58-годишен грчки државјанин изгубил контрола и излетал надвор од коловозот на земјена површина, по што неколку пати се превртел и удрил во металната еластична ограда.
– Возачот и двајцата сопатници, исто така грчки државјани, се здобиле со телесни повреди и се пренесени во Медицински центар Велес заради укажување лекарска помош, појасни таа.
По овластување на Јавен обвинител и Истражен судија од Основен суд Велес увид на лице место изврши увидна екипа од Секторот за внатрешни работи – Велес.
– Во сообраќајната несреќа двајца од тројцата патници веднаш се пренесени во велешката Градска болница, информира на денешната прес – конференција Силвана Мишкова, портпарол на Градската болница од Велес.
– Возачот е со површински повреди во пределот на главата и на градниот кош, направени се дополнителни испитувања, ренген снимки на глава и граден кош. Исклучени се посериозни повреди. Сопатникот има една рана во предел на главата, санирана е раната, згрижени се пациентите, рече др. Мишкова.