Во текот на вчерашниот ден на подрачјето на Град Скопје од страна на сообраќајната полиција извршен е увид на вкупно 11 сообраќајни незгоди.
Од нив, осум се со последица материјална штета и две се со последица телесна повреда во кои со полесни повреди се здобиле двајца пешаци и еден возач на мопед.
Се случила и една незгода со последица тешка телесна повреда. Taa се случила во 10:20 часот на крстосницата од ул. „Антон Попов“, од улица „Виктор Иго“ и сервисна улица која води кон паркинг просторот пред зграда бр. 16 лоцирана на ул. „Антон Попов“ во која учествувале патничко моторно возило „цитроен“ со скопски регистарски таблички, управувано од граѓанин на Скопје и пешак, роден 1947 година, граѓанин на Скопје. Во незгодата со тешки телесни повреди се здобил пешакот кој со возило на Брза помош бил пренесен во ГОБ „Св. Наум Охридски“, а по укажаната лекарска помош е задржан на понатамошно лекување.
Денеска Отсекот за превенција при Единицата за безбедност во патниот сообраќај при СВР Скопје ќе одржи едукативни работилници во Основното училиште „Кочо Рацин“ кое се наоѓа на подрачјето на општина Центар со учениците од второ одделение.
Денеска со почеток во 9 часот поранешните вработени во ОХИС ќе одржат мировен протест на бул. „Илинден“ пред зградата на Владата на Република Македонија. Со цел непречено одвивање на сообраќајот од страна на сообраќајната полиција ќе бидат преземени соодветни мерки за сообраќајно обезбедување, а по потреба и пренасочување на сообраќајот.