Во три штипски средни училишта во тек е уписот на ученици во прва година за учебната 2018-2019 година во августовскиот уписен рок. Најмногу слободни места има во текстилното училиште „Димитар Мирасчиев“, каде што во првиот уписен рок се запишаа над 20 ученици, а потоа и во гиманизијата „Славчо Стојменски“ и електро-машинскиот училишен центар „Коле Нехтенин“.
– На денешниот уписен рок до 9 часот имаме запишано девет ученици. Во машинската струка имаме 45 слободни места, во електро-техничката струка имаме 59 слободни места, додека во угостителската струка нема слободни места, вели Дејан Павлов, директор на СОУ „Коле Нехтенин“-Штип.
Во штипската гимназија „Славчо Стојменски“ до 11 часот запишани се 28 ученици, а како што вели Тамер Јамаковски, професор во гимназијата, имаат уште слободни места, кои можат да се пополнат.
Средното медицинско училиште „Јане Сандански“-Штип уписите на ученици во прва година ги заврши уште во првото пријавување на јулскиот уписен рок, каде што најголем интерес имаше за струката медицинска сестра.
