Во организација на Македонски пошти и на локалната сампоуправа денеска во Прилеп се одржа прв поштенски меѓнароден маратон.
Според Влатко Атанасоски од Агенција за пошти, ова е прв ваков тематски маратон во светот.
– Ова е прв тематски маратон во светот. Идејата е да се промовира здравиот начин на живот, активниот начин на живот, и тоа преку најтешката атлетска дисциплина која е тесно поврзана со издржливоста на поштарите како разнесувачи на добрите вести. Имаме учесници, освен од Македонија и од Србија, Бугарија, Хрватска и Словенија, вели Атанасоски.
Трката се одржа низ улиците на Прилеп во три категории. За младите до 21 километар, а за возрасните од 42 километри.
За прилепскиот градоначалник Марјан Ристески ова е убава манифестација на која би можело да се работи да се прошири и да има илјадници учесници.
– Имаме натпреварувачи од повеќе држави, а наредната година, заедно со организаторите ќе работиме на еден поголем проект овде да бидат и врвни атлетичари од целиот свет, вели Марјан Ристески, градоначалник на Прилеп.
Организаторите се надеваат во догледно време да се постигне и нов македонски рекорд во маратон, а попладнето пригодно на најдобрите и успешните во трката ќе им бидат доделени награди.