Деловно-трговски објект на површина од околу 1.600 метри квадратни ќе се гради во центарот на Прилеп.
Плацот е продаден за 400.000 евра на електронска аукција, а засега инвеститорот останува тајна. Од локалната самоуправа информираат дека еден квадрат е продаден за 15.500 денари, инаку седум пати повисока од почетната цена, која изнесуваше 2.250 денари, пишува „Дневник“.
Според весникот, се водела жестока битка во наддавањето на три македонски компании, од која едната успеала да плати највисока цена.
Плацот е на просторот на покриениот пазар за продажба на млечни производи, кој ќе се урива за да се изгради деловно-трговскиот центар со приземје и два ката и подземна гаража со површина од околу пет илјади квадратни метри. Дел од деловниот просторот треба да му припадне на јавното претпријатие „Пазари“. Инвеститорот за една година ќе изготви проект, а објектот ќе го гради максимум шест години.